සිහින සතක් දු‍ටුවෙමි මම

සිහින සතක් දු‍ටුවෙමි මම

සත් දවසක් එක විලසම

එක සිහිනෙක ඔබ දු‍ටුවා

සිඟන්නියක සේ

ඔබ මගෙ පැල්පතට පැමිණ

ආයාචනයක් කරමින්

ජීවත් වන්නට කිසිවක් 

ඉල්ලා සිටියා

කිසිවක් දෙන්නට මට නැත

තිබුණේ පිරිසිඳු හදවත

සිඟන්නියේ එය ඔබහට

දුන්නා මතකයි

එදා මගේ හද අරගත්

ඔබ අද මට වැඩි පොහොසත්

ඒ හින්දා මටත් එලෙස 

පිහිට වනු මැනේ

ගායනය: වික්ටර් රත්නායක මහතා

බොඳ මීදුම් කඳු රැල්ලේ

බොඳ මීදුම් කඳු රැල්ලේ සුරංගනා රජ දහනේ

ඔබේ සිනා කඳුළු බිඳත් හෙටත් වාසනා

හෙටත් වාසනාවන්

සිහින නදී රළ රැල්ලේ පැතුම් රුවන් රන් ඔරුවේ

ඔබේ නිමල නිද්‍රා ගී මටත් වාසනා

මටත් වාසනාවන්

සිතක තැවුල් සන්සිදිලා

මිටියාවත මල් ඉසිලා

මල් වරුසා සුවඳ සමය

මටත් වාසනා මටත් වාසනාවන්

රෑ සියන්නෙ නොනිමි නාද

සැවුල් කොවුල් විහඟ ගීත

අපට ඇරුණු හුදකලාව

මටත් වාසනා හෙටත් වාසනාවන්

මාල හතක් පලදන්නට

හීන හතක් එළි වන්නට

දොළොස්මහේ පහන් නිවී

මටත් වාසනා හෙටත් වාසනාවන්

අනාගතය කිරුළු දරා

දෙපාමුලට වඩින තුරා

ළවන් පොඟන මියුරු තෙපුල්

මටත් වාසනා හෙටත් වාසනාවන් 

ගායනය: සුජාත අත්තනායක මහත්මිය, අබේවර්ධන බාලසූරිය මහතා

ආදර ප්‍රිය ළඳුනේ

ආදර ප්‍රිය ළඳුනේ
මට මුළු ලොවම ඔබයි
ඔබගේ ආදරයයි

කෝමල දෑසින් වත කමලේ
සිතුවිලි විහඟුන් අවදි කලේ
මුව මදහාසේ ... සතුට ගෙනාවේ...
මටම නොවේ දෝ

ආදර රැහැනින් හද බැඳුනේ
පැතු විලසින්දෝ පෙර භවයේ
යොවුන් වසන්තේ... පවන් සැලෙන්නේ...
අපට නොවේ දෝ 

ගායනය: ෆීලික්ස් ඇන්ටන් මහතා

අප දෙදෙනා දිහා බල බලා

අප දෙදෙනා දිහා බල බලා

පුංචි සේපාලිකා මල් ගහේ නැවතිලා

වන්දනාවේ ගියා සමනලුන්

අප දෙදෙනා දිහා බල බලා

දුර ඈත දේසෙන් මෙහි ආ දිනේදි

මට දී නවාතැන් මේ පුංචි කුටියේ

මට පෑ ඔබේ ආදරේ

නොමැකී තියේ මා හදේ

වෙන් වී මෙසේ මා යමි මේ සැඳෑවේ

ඔබ පෑ සිනාවන් මතකේ මවාලා

නික්මී ගියත් මේ ලෙසින්

පිටමන් නොවේ ඔබ සිතින්

ගායනය: තිලකසිරි රත්නායක මහතා

රන් තරු පායන

රන් තරු පායන අහස බලාගෙන

ඇයි ඔබ තව හිනැහෙන්නේ

මගෙ හද දිනු ආදරය සොරාගෙන

වෙනකෙ‍කු නොවැ අද ඉන්නේ

මිහිර සොයාගිය මගෙ ජීවය දැන්

කඳුලැලි හා ලතවන්නේ

සමාවෙයන් සොඳුරියෙ තවමත් මා

අතමයි වරද තියෙන්නේ

කුඩා රුවල බැඳ තනිව සයුර මැද

ඈත අතීතය දෙස බැලුවේ

කොහේ සිටන් කොයිබට මා යාවිද

මටනම් නැහැ වැටහෙන්නේ

පලා දෙපළු කල හදවත දැන් නම්

කාට එකතු කල හැක්කේ

බලාගන්න සෙනෙහස තව ඔබටයි

මා හද තුල හැමවේලේ

ගායනය: කීර්ති පැස්කුවල් මහතා

රුවන් තාරකා

රුවන් තාරකා නුවන් පායලා

හිදින් හද‍වතේ රැඳි වේදනා නිවා

නිසල රැයේ නැගෙන සඳේ

සිසිල වූ ඔබේ

සෙවණ ඇගේ සුවය ගෙනේ

නිබඳ මා වෙතේ

නිබඳ මා වෙතේ

තිසර විලේ පිපුනු මලේ

රැඳුණු ආදරේ

සුවඳ ගෙනේ සතර දෙසේ

යොවුන් මාවතේ

යොවුන් මාවතේ

ගායනය: බණ්ඩාර ආතාවුද මහතා

අපි හැඟුම් වලට ඉඩදී මොහොතක්‌

අපි හැඟුම් වලට ඉඩදී මොහොතක්‌

ඉඩ ලබාගනිමු තරමින් වියතක්‌

හඳ පානේ මද අඳුරේ අත් පටලා යමු ආයේ

ඔබ ඔබෙ හෙවණැල්ලෙන් මිදී

මම මගෙ හෙවණැල්ලෙන් මිදී

අවුදින් හිමින් රහසින් මුමුණා

හඳ පානේ මද අඳුරේ 

හඳ පානේ මද අඳුරේ අත් පටලා යමු ආයේ

හිරකර හසරැල්ලෙන් හැඩුම්

අපි හිනැහෙමු සපුරා පැතුම්

මතු ආත්මයේ හමුවෙන පැතුමින්

යමු වෙන්වී හිමිදිරියේ

හඳ පානේ මද අඳුරේ අත් පටලා යමු ආයේ

ගායනය: වික්ටර් රත්නායක මහතා