අසුරු සැනින් එක මොහොතක දී

අසුරු සැනින් එක මොහොතක දී - කාලය නැවතී යළි ඇරඹී

විශ්වය අළුතින් බිහිවේවා-ඔබේ ම වී මා- ම ගේ ම වී ඔබ

අපේ ම වී අප ඉපදේවා......!!!!

යෙහෙළියන් ගෙ ඉඟි දිනක සැබෑ වී - ඔබේ ම කුළ ගෙයි පතිනිය වන්නට

මතුයම් දවසක හැකි වේවා......
ඔබේ ම වී මා- ම ගේ ම වී ඔබ

අපේ ම වී අප ඉපදේවා......!!!!

සෙනෙහෙ විමානේ කිරුළ දරන දා - සිගිති තොලක කිරි හිනා දකින්නට

එක සෙවනකදි හමු වෙවා.....

ඔබේ ම වී මා- ම ගේ ම වී ඔබ

අපේ ම වී අප ඉපදේවා...

ගායනය: යමුණා විනෝදිනි මහත්මිය

දවසින් දවසට කොළයෙන් කොළයට

 දවසින් දවසට කොළයෙන් කොළයට
කොළ අඩුවෙනවා දින දසුනේ..
මොහොතින් මොහොතට මා ගැන සටහන්
වියැකී යනවා ඔබ මනසේ..

පුරපස අවපස වෙනසක් වූවද
ඔබ වෙයි සඳ මගෙ හද අඹරේ
මගෙ ඒ සිතුවිලි හා සබැ‍ඳේවි ද
මුදු සිතුවිලි ඔබ හද මැදුරේ

සිතුවෙම් සිතනෙමි හුරු ලෙස ඔබ ගැන
මගෙ හිත චංචල වූයේ නෑ
දින දසුනේ තව එක කොළයක් ඇත
එක දවසකි ඉතිරිව ඇත්තේ

සිතන්න බොළඳියෙ මගේ කුටියටත්
ඔබෙ කුටියට මෙන් වසරින් වසරට
නව දින දසුනක් එනවා....

ගායනය: විශාරද එඩ්වර්ඩ් ජයකොඩි මහතා 

පවණට සැලෙනා

පවණට සැලෙනා... දොඹමල් සුවඳින්...
ආදර හස‍රැල් මුවට නැගෙයිදෝ....
සවනට කොඳුරා... පවසන වදනින්...
ආදර හැඟුමන් හිතට දැනෙයිදෝ...

මල් ඇතුරුණු ඒ සුව යහනේ ඔබ...
අඩවන් දෙනෙතින් ආලවඩයි දෝ...
මා ඇකයේ සිට පොඩි පුතු හඬනා...
ඒ දුක්බර හඬ ඔබට ඇසෙයි දෝ...

ඇකයේ සිට මා පුතු හඬනා සඳ...
ලේ කිරි වීදැයි නොදනිමි මා ලඟ...
අසරණ දෙනෙතින් පුතු දෙස බැලු සඳ...
දු‍ටුවේ වැගිරුණු කඳුලු පමණි ලඳ...

ගායනය:  ටී.එම්.ජයරත්න මහතා 

අතීතය සිහිනයක් පමණයි

 අතීතය සිහිනයක් පමණයි

සබැ සුවඳක් නෑ....

එදා සෙනෙහෙන් නොබැදුනානම්

මෙදා වියෝවක් නෑ....

තැනූ මන්දිර බිඳී වැටුනත්

නෙතේ කඳුලක් නෑ....

සිනා සෙන්නට වරම් නොලදත්

සිතේ කිළුටක් නෑ....

සොබාදහමට නොවන අවනත

ලොවේ කිසිවක් නෑ....

ලොවේ පැරදුම මිසක කිසිදා

ලැබූ දිනුමක් නෑ....

ගායනය: කරුණාරත්න දිවුල්ගනේ මහතා 

පෙනෙන නොපෙනෙන දුරක ඉඳන්

පෙනෙන නොපෙනෙන දුරක ඉඳන්
නුඹ ඇවිත් හිත ළඟට හොරෙන්
ආවාට නොකියාම ජීවිතෙන්
නවතින්න හිතුවාද ආයෙමත් ආදරෙන් ...

දකින හිමිවන හීනේ නුඹ කොතැන හිටියා
මතක සැමරුම් අතරේ ජීවිතේ තිබුණා
හඬන හිනැහෙන නෙත් නුඹේ උරහිසේ තිබුණා
ඇත්තමයි නුඹ අහසක් වගේමයි හිතුනා...

නුහුරු නුපුරුදු හීන අරං
ළඟට ඇවිදින් තුරුළු වෙමින්
ආවාට නොකියාම ජීවිතෙන්
නවතින්න හිතුවාද ආයෙමත් ආදරෙන් ...

මිරිඟුවක හිස තියලා නුඹ දුරක ඇදුනා
රංචු ගැහෙනා රෑනේ තනිකමත් දැනුනා
ඇසිල්ලක දුටු හීනෙන් හිත හුඟක් රිදුනා
අරුත නොදකින සෙනෙහේ ඔය නමත් රැඳුනා...

ගායනය: ආත්මා ලියනගේ මහතා